UP: కాన్పూర్‌లో ఘోర ప్రమాదం: 17 మంది మృతి

కాన్పూర్‌: ఉత్తరప్రదేశ్‌లోని కాన్పూర్‌లో మంగళవారం రాత్రి ఘోర ప్రమాదం చోటుచేసుకుంది. కాన్పూర్‌ సమీపంలోని సచెంది వద్ద  ఓ మిని బస్సు జేసీబీని ఢీకొని ఆపై బ్రిడ్జి నుంచి కిందపడింది. దీంతో 17 మంది మృతి చెందినట్లు కాన్పూర్‌ ఐజీ మోహిత్‌ అగర్వాల్‌ తెలిపారు. పలువురు ప్రయాణికులు తీవ్రంగా గాయపడ్డారు. సమాచారం అందుకున్న పోలీసుల ఘటనాస్థలికి చేరుకుని సహాయక చర్యలు చేపట్టారు. గాయపడిన వారిని సమీప ఆసుపత్రులకు తరలించారు. ఘటనాస్థలంలోనే పలువురు మృతిచెందినట్లు పోలీసులు తెలిపారు. గాయపడిన వారిలో పలువురి విషమంగా ఉన్నట్లు సమాచారం. బస్సు లఖ్‌నవూ నుంచి దిల్లీకి వెళ్తుండగా ఈ ఘటన జరిగింది. ఈ ప్రమాదం విషయం తెలుసుకున్న ఉత్తరప్రదేశ్‌ సీఎం యోగీ ఆదిత్యనాథ్‌ తీవ్ర విచారం వ్యక్తం చేశారు. మృతిచెందిన వారి కుటుంబ సభ్యులకు రూ.రెండు లక్షల పరిహారం ప్రకటించారు. తక్షణమే ప్రమాదంపై విచారణ చేయాల్సిందిగా అధికారులను ఆదేశించారు. ప్రమాదంలో మృతిచెందిన వారికి ప్రధాని మోదీ సంతాపం తెలిపారు. పీఎం రిలీఫ్‌ ఫండ్‌ నుంచి మృతుల కుటుంబ సభ్యులకు రూ. రెండు లక్షల పరహారం, గాయపడినవారికి  రూ.50,000 చొప్పున  ప్రకటించారు.