Apsara Murder Case: తలకు బలమైన గాయాలవల్లే అప్సర చనిపోయింది: పోస్టుమార్టం నివేదిక

హైదరాబాద్: పెళ్లి చేసుకోవాలంటూ ఒత్తిడి తెస్తోందని ప్రియురాలు అప్సరను అతికిరాతకంగా హతమార్చిన ఘటన నగరంలో సంచలనం రేపిన విషయం తెలిసిందే. తాజాగా ఉస్మానియా ఆస్పత్రిలో అప్సర మృతదేహానికి పోస్టుమార్టం పూర్తయింది. ఉస్మానియా ఫోరెన్సిక్ వైద్యుడు యాదయ్య బృందం పోస్టుమార్టం చేశారు. ప్రాథమిక నివేదికను వైద్యులు పోలీసులకు అందించారు. తలకు బలమైన గాయాలు కావడంతోనే అప్సర ప్రాణాలు కోల్పోయినట్లు పోలీసులకు వైద్యులు తెలిపారు. అనంతరం అప్సర మృతదేహాన్ని పోలీసులు కుటుంబసభ్యులకు అప్పగించారు. సరూర్‌నగర్‌లో అంత్యక్రియలు నిర్వహించనున్నట్లు వారు తెలిపారు.

మరోవైపు ఈ కేసులో నిందితుడిగా ఉన్న సాయికృష్ణను పోలీసులు రిమాండ్‌కు తరలించారు. శంషాబాద్‌ పోలీసులు సాయికృష్ణను జడ్జి ఎదుట హాజరు పరచగా.. 14 రోజుల రిమాండ్‌ విధించారు. దీంతో నిందితుడిని పోలీసులు చర్లపల్లి జైలుకు తరలించారు.