Andhra News: అమర్తలూరు పోలీస్‌ స్టేషన్‌లో వైకాపా కార్యకర్తల వీరంగం

అమర్తలూరు: బాపట్ల జిల్లా అమర్తలూరు పోలీస్‌ స్టేషన్‌లో వైకాపా కార్యకర్తలు రెచ్చిపోయారు. పాత కేసులో నిందితుడైన పాంచాలవరం గ్రామానికి చెందిన శ్లారాను విచారణ నిమిత్తం పోలీస్‌ స్టేషన్‌కు తీసుకొచ్చారు. విచారణ జరుగుతున్న సమయంలో తన సోదరుడిని ఎందుకు స్టేషన్‌కు తీసుకొచ్చారంటూ అన్న వెంకట్‌ పోలీసులపై దౌర్జన్యానికి దిగాడు. అసభ్య పదజాలంతో పోలీసులను దూషిస్తూ శ్లారా, వెంకట్‌ పోలీస్‌ స్టేషన్‌లోనే వీరంగం వేశారు. గొడవ జరుగుతున్న సమయంలో శ్లారా పోలీసుల నుంచి తప్పించుకుని పరారయ్యాడు. ప్రస్తుతం వెంకట్‌ పోలీసుల అదుపులో ఉన్నాడు. ఇద్దరు నిందితులపై కేసు నమోదు చేసి దర్యాప్తు చేస్తున్నట్టు ఎస్‌ఐ అనిల్‌ కుమార్‌ తెలిపారు. ఈ ఇద్దరూ వైకాపాలో క్రియాశీలకంగా ఉన్నారని వెల్లడించారు.