Telangana News: బ్యాంకులను మోసం చేసిన బల్వీందర్‌ సింగ్‌ అరెస్టు

హైదరాబాద్‌: బ్యాంకులను మోసం చేసి మనీలాండరింగ్‌కు పాల్పడ్డారన్న అభియోగంపై పీసీహెచ్‌ గ్రూప్‌ డైరెక్టర్‌ బల్వీందర్‌సింగ్‌ను ఎన్‌ఫోర్స్‌మెంట్‌ డైరెక్టరేట్‌ (ఈడీ) అరెస్టు చేసింది. బల్వీందర్‌సింగ్‌ పీసీహెచ్‌ గ్రూప్‌ సంస్థల పేరిట వివిధ బ్యాంకుల నుంచి రుణాలు తీసుకొని సుమారు రూ.370 కోట్ల మోసానికి పాల్పడ్డారని చెన్నై, బెంగళూరులో సీబీఐ  గతంలో కేసులు నమోదు చేసింది. సీబీఐ కేసుల ఆధారంగా మనీలాండరింగ్‌పై ఈడీ దర్యాప్తు చేస్తోంది. బ్యాంకుల నుంచి తీసుకున్న రుణాలను డొల్ల కంపెనీల ద్వారా వ్యక్తిగత, సంస్థల ఖాతాలకు మళ్లించుకున్నట్టు తేలిందని ఈడీ వెల్లడించింది. బ్యాంకులకు రుణాలు చెల్లించకుండా మోసం చేశారని తెలిపింది. బల్వీందర్‌సింగ్‌కు న్యాయస్థానం ఈనెల 23 వరకు రిమాండ్‌ విధించడంతో చంచల్‌గూడ జైలుకు తరలించారు.