Crime news: నీలి చిత్రాల్లో నటించిందన్న అనుమానం.. భార్యను కడతేర్చిన ప్రబుద్ధుడు

బెంగళూరు: నీలి చిత్రాలకు అలవాటుపడిన ఓ ప్రబుద్దుడు అమానుషానికి పాల్పడ్డాడు. ఆ చిత్రాల్లో నటించిందేమోనన్న అనుమానంతో తన భార్యనే కడతేర్చాడు. ఈ ఘటన కర్ణాటకలో జరిగింది. బెంగళూరుకు చెందిన ఆటో డ్రైవర్‌ జహీర్ పాషా తరచూ పోర్న్‌ చూసేవాడు. ఈ క్రమంలో రెండు నెలల క్రితం చూసిన ఓ చిత్రంలో కనిపించింది తన భార్యేనని అనుమానం పెంచుకున్నాడు. అప్పటి నుంచి ప్రతిరోజూ భార్యతో గొడవ పడుతుండేవాడు. ఇదే క్రమంలో ఈ ఆదివారం ఆమెను హత్య చేశాడు. తన పిల్లల ముందే కత్తితో పొడిచి ప్రాణాలు తీశాడు.

జహీర్ పాషా దంపతులకు 15ఏళ్ల క్రితం వివాహమైంది. వీరికి ఐదుగురు పిల్లలు ఉన్నారు. అయితే అక్రమ సంబంధాలు ఉన్నాయంటూ భార్యపై జహీర్‌ నిత్యం ఆరోపణలు చేసేవాడు. రెండు నెలల క్రితం పోర్న్‌ వీడియోను చూసినరోజే.. ఓ కుటుంబ ఫంక్షన్​లో భార్యను తీవ్రంగా కొట్టాడు. తర్వాత నిత్యం వేధింపులకు గురిచేశాడు. 20 రోజుల క్రితం తీవ్రంగా కొట్టడంతో ఆమె ఆసుపత్రి పాలైంది. ఈ క్రమంలోనే హత్య చేసేందుకు వెనకాడలేదు. ఘటనను ప్రత్యక్షంగా చూసిన కుమారుడు భయంతో వెంటనే తాతయ్య ఇంటికి వెళ్లి విషయం చెప్పాడు. పోలీసులు కేసు నమోదు చేసి దర్యాప్తు చేపట్టారు.