Bomb explode: బంతి అనుకొని బాంబుతో ఆడి...

కోల్‌కతా: బాంబును బంతిగా భ్రమించి.. దానితో ఆడుకొని ఐదుగురు పిల్లలు గాయపడ్డారు. వీరిలో ముగ్గురి పరిస్థితి విషమంగా ఉండగా మరో ఇద్దరు కోలుకొంటున్నారు. పశ్చిమబెంగాల్‌లోని కలియాచక్‌ ప్రాంతంలో ఉన్న మామిడి తోటలో కొందరు గుర్తుతెలియని వ్యక్తులు బాంబులను దాచారు. ఆదివారం సాయంత్రం ఐదుగురు పిల్లలు వాటిని చూసి బంతులుగా భ్రమించారు. వాటితో ఆడుకొనేందుకు ప్రయత్నించగా.. అవి పేలి వారు గాయపడ్డారు. తీవ్రంగా గాయపడిన ముగ్గురిని స్థానికులు మాల్దా మెడికల్‌ కాలేజీ ఆసుపత్రిలో చేర్పించారు. మరో ఇద్దరికి కలియాచక్‌లోని ఆరోగ్య కేంద్రంలో చికిత్స చేస్తున్నారు. ఈ ఘటనపై కేసు నమోదు చేసుకొని దర్యాప్తు చేపట్టామని పోలీసులు తెలిపారు. ఆ ప్రదేశంలో మిగిలిన బాంబులను సోమవారం పేల్చేస్తామని వెల్లడించారు.