Bride commits suicide: ఆరోపణ శూలమై.. మనసు గాయమై!

నవ వధువు బలవన్మరణం

హత్నూర, న్యూస్‌టుడే: భర్త మోపిన చోరీ నిందారోపణ, వేధింపుల్ని భరించలేక పెళ్లయిన నెల రోజులకే నవ వధువు బలవన్మరణానికి పాల్పడింది. ఈ ఘటన సంగారెడ్డి జిల్లా హత్నూర మండలం పన్యాలలో గురువారం చోటుచేసుకుంది. జిన్నారం సీఐ వేణుకుమార్‌, ఎస్సై లక్ష్మారెడ్డి తెలిపిన వివరాలు.. పన్యాలకు చెందిన నీరుడి బాగయ్యకు సదాశివపేట మండలం రెండ్లపల్లికి చెందిన అఖిల(19)తో మే 7న వివాహమైంది. 4 రోజుల క్రితం ఆమె పుట్టింటికి వెళ్లింది. ఇంట్లో నుంచి బంగారు గొలుసు పోయిందని, నువ్వే తీశావంటూ బాగయ్య ఫోన్‌ చేసి భార్యను అడిగాడు. దొంగతనం చేయాల్సిన అవసరం తనకు లేదని ఆమె భర్తతో వాదించింది. అనంతరం ఈ నెల 6న బాగయ్య అత్తారింటికి వెళ్లాడు. అక్కడా గొడవ జరిగింది. భార్యాభర్తలిద్దరూ బుధవారం పన్యాలకు వచ్చారు. మరోసారి బాగయ్య అవే ఆరోపణలు చేయగా.. కుటుంబ సభ్యులు అతడికి వంత పాడారు. దీంతో మనస్తాపం చెందిన అఖిల ఇంట్లోనే ఉరి వేసుకొని ఆత్మహత్యకు పాల్పడింది. తన మరణానికి భర్తే కారణమని, పోయిందన్న బంగారు గొలుసు ఇంట్లోనే దొరికిందని అఖిల లేఖ రాసినట్లు పోలీసులు తెలిపారు. తమ కుమార్తెను హత్య చేసి ఆత్మహత్యగా చిత్రీకరిస్తున్నారని అఖిల తల్లిదండ్రులు ఆరోపించారు. మృతదేహాన్ని సంగారెడ్డి ప్రభుత్వ ఆసుపత్రికి తరలించే క్రమంలో ఇంటివద్ద కాసేపు ఉద్రిక్తత చోటుచేసుకుంది. కేసు దర్యాప్తు చేస్తున్నట్లు సీఐ తెలిపారు.