Andhra News: పెళ్లిపీటలపై విషాదం.. కుప్పకూలిన వధువు

విశాఖ: విశాఖపట్నం మధురవాడలో జరిగిన ఓ వివాహంలో విషాదం చోటు చేసుకుంది. వివాహ వేడుకలో పెళ్లిపీటలపై వధువు స్పృహ కోల్పోయింది. సరిగ్గా జీలకర్ర బెల్లం పెట్టే సమయంలో పెళ్లికుమార్తె కుప్పకూలింది. దీంతో వధువు సృజనను బంధువులు ఆస్పత్రికి తరలించారు. ఆస్పత్రిలో చికిత్స పొందుతూ వధువు మృతిచెందింది.

శివాజీ, సృజనల వివాహం బుధవారం రాత్రి 7 గంటలకు జరగాల్సి ఉండగా.. కుటుంబ సభ్యులు సాయంత్రం రిసెప్షన్‌ ఏర్పాటు చేశారు. అనంతరం వివాహం జరుగుతున్న సమయంలో పెళ్లికుమార్తె కుప్పకూలింది. బంధువులు వెంటనే వధువును ఆస్పత్రికి తరలించగా అక్కడ చికిత్స పొందుతూ ఈ తెల్లవారుజామున మృతి చెందింది.  సృజన మృతికి గల కారణాలు తెలియాల్సి ఉంది. పెళ్లికుమార్తె మృతితో ఇటు వధువు, అటు వరుడు కుటుంబాలు విషాదంలో మునిగిపోయాయి.