Madhya Pradesh: కాబోయే అత్త, ఆడపడుచుకు టీలో మత్తుమందు కలిపిచ్చి.. వధువు పరారు..

భోపాల్‌: మరో మూడు రోజుల్లో పెళ్లి ఉండగా కొబోయే అత్త, ఆడపడుచులకు టీలో మత్తు మందు కలిపి ఇంట్లోని సొమ్ము తీసుకొని వధువు పరారైంది. సినిమాలోని సన్నివేశాన్ని తలపించే ఈ ఘటన మధ్యప్రదేశ్‌లోని మందసౌర్‌ ప్రాంతంలో జరిగింది. పోలీసులు తెలిపిన వివరాల ప్రకారం.. మందసౌర్‌లో నివాసముంటున్న ఓ కుటుంబంలోని వ్యక్తికి ఎంత వయసైనా పెళ్లి కాకపోవడంతో రత్లాంకు చెందిన మంగళ అనే మహిళను సంప్రదించారు. ఆమె వీళ్ల దగ్గరి నుంచి రూ.2లక్షలు తీసుకొని నర్మదాపురానికి చెందిన ఆర్తి బింద్‌ అనే అమ్మాయితో సంబంధం కుదిర్చింది. మరో మూడు రోజుల్లో వివాహం జరగనుంది. ఇంట్లో కాబోయే అత్త, ఆడపడుచు మాత్రమే ఉన్న సమయంలో వాళ్లిద్దరికీ టీలో మత్తు మందు కలిపి రూ.లక్ష తీసుకొని ఆర్తి పరారైంది. ప్రస్తుతం వాళ్లిద్దరూ ఆసుపత్రిలో ఐసీయూలో చికిత్స పొందుతున్నారు. పోలీసులు పలు సెక్షన్ల కింద కేసు నమోదు చేసి దర్యాప్తు జరుపుతున్నారు.