Crime News: మిర్యాలగూడలో కారు బీభత్సం.. పలు వాహనాలు ధ్వంసం

మిర్యాలగూడ పట్టణం: నల్గొండ జిల్లా మిర్యాలగూడ పట్టణంలోని తహసీల్దార్‌ కార్యాలయం ఎదురుగా ఉన్న హోటల్‌లోకి  కారు దూసుకెళ్లి బీభత్సం సృష్టించింది. ఒకటో పట్టణ పోలీసులు, స్థానికులు తెలిపిన కథనం ప్రకారం.. ఆదివారం రాత్రి ఆర్డీవో కార్యాలయం వైపు నుంచి హౌసింగ్‌ బోర్డు కాలనీ వైపు వెళ్తున్న ఓ కారు హోటల్‌ వద్దకు రాగానే ఒక్కసారిగా అదుపుతప్పింది. ఈ క్రమంలో హోటల్‌ ఎదురుగా ఉన్న నాలుగు ద్విచక్రవాహనాల పైకి దూసుకెళ్లడంతో అవి ధ్వంసమయ్యాయి. ఆ పక్కనే ఉన్న ఇద్దరికి గాయాలయ్యాయి. దీంతో స్థానికులు గాయపడ్డ వారిని సమీపంలోని ప్రాంతీయ ఆసుపత్రికి తరలించారు. ప్రమాద దృశ్యాలు సీసీ కెమెరాలో రికార్డయ్యాయి. ఘటనపై కేసు నమోదు చేసి దర్యాప్తు చేస్తున్నట్లు సీఐ ఎం. శ్రీనివాస్‌ తెలిపారు.