తుపాకీ పేల్చిన పెళ్లి కుమార్తె.. కేసు నమోదు

లఖ్‌నవూ: పెళ్లి పీటలపైకి ఎక్కబోతూ ఓ వధువు తుపాకీతో గాల్లోకి కాల్పులు జరపడంతో ఆమెపై పోలీసులు కేసు నమోదు చేశారు. ఈ ఘటన ఉత్తరప్రదేశ్‌లోని ప్రతాప్‌గఢ్‌ జిల్లా జెత్వారా ప్రాంతంలో చోటు చేసుకుంది. ఇటీవల ఓ వివాహ వేడుకలో పెళ్లి కూతురు.. వరుడుతో పాటు పెళ్లి మండపంపైకి ఎక్కుతూ తన వివాహం ఎప్పటికీ గుర్తిండిపోయే విధంగా ఉండాలని తుపాకీతో గాల్లోకి కాల్పులు జరిపింది. అయితే, ఈ వీడియో సోషల్‌మీడియాలో వైరల్‌గా మారడంతో పోలీసుల కంటపడింది. 

ఆ వీడియో ఆధారంగా విచారణ జరిపిన పోలీసులు వధువు రూపా పాండేగా గుర్తించి ఆమెపై కేసు నమోదు చేశారు. అలాగే తుపాకీ యజమాని, వధువు మేనమామ రామ్‌నివాస్‌ పాండేపై కూడా కేసు నమోదు చేశారు. లైసెన్స్‌డ్‌ తుపాకే అయినా, నిబంధనలకు విరుద్ధంగా ఉపయోగించినందుకు పోలీసులు వారిపై చర్యలు తీసుకున్నారు. రామ్‌నివాస్‌ తపాకీ లైసెన్స్‌ను రద్దు చేయబోతున్నట్లు తెలిపారు. అలాగే కొవిడ్‌ నిబంధనలను ఉల్లంఘిస్తూ పెద్ద సంఖ్యలో అతిథుల మధ్య పెళ్లి వేడుక నిర్వహించినందుకు పెళ్లి పెద్దలపై మరో కేసు కూడా నమోదైంది. ఉత్తరప్రదేశ్‌లో వివాహానికి 25 మందికి మించి అతిథులు హాజరుకాకూడదనే నిబంధన ఉంది.