చిన్నారికి వేధింపులు.. వృద్ధ జంటకు జైలు

ముంబయి: అభం శుభం తెలియని నాలుగేళ్ల చిన్నారిని లైంగికంగా వేధించిన కేసులో 80 ఏళ్ల వృద్ధ జంటకు మహారాష్ట్ర ప్రత్యేక న్యాయస్థానం 10 ఏళ్ల జైలు శిక్ష విధించింది. ఈ మేరకు న్యాయమూర్తి రేఖ పోక్సో చట్టం ప్రకారం శుక్రవారం తీర్పును వెలువరించారు. ఎనిమిదేళ్ల కిందట జరిగిన ఈ ఘటనకు సంబంధించి వివరాలు ఇలా ఉన్నాయి.

2013 సెప్టెంబర్‌ 4న పాఠశాల నుంచి మధ్యాహ్నం ఇంటికి వచ్చిన నాలుగేళ్ల చిన్నారి తొలుత భోజనం చేసి తన స్నేహితురాలితో ఆడుకోవడానికి అదే అపార్టుమెంటులోని నాలుగో అంతస్తుకు వెళ్లింది. ఆ సమయంలో తన స్నేహితురాలు నిద్రించి ఉండడంతో తిరిగి వస్తున్న క్రమంలో తాత-నాన్నమ్మ అంటూ ముద్దుగా పిలుచుకునే వృద్ధ దంపతులు చిన్నారిని ఆపారు. స్నేహంగా మాట్లాడుతూ ఇంట్లోని ఓ గదిలోకి తీసుకెళ్లారు. అక్కడ చిన్నారిని వివస్త్రను చేసి, వారించినందుకు కొడుతూ లైంగికంగా వేధించారు. ఈ ఘటనలో వృద్ధుడి భార్య సహకరించడం గమనార్హం. అయితే, వృద్ధ దంపతుల చేష్టల నుంచి తప్పించుకున్న చిన్నారి.. రాత్రి తన తల్లికి ఈ విషయాన్ని తెలియజేసింది. చిన్నారి లోదుస్తులను విప్పి చూడగా విషయం బయటకొచ్చింది. అనంతరం తన భార్తతో కలిసి ఆమె స్థానిక పోలీస్‌స్టేషన్‌లో ఫిర్యాదు చేయగా.. ఆ మరుసటి రోజు దంపతులిద్దరినీ పోలీసులు అరెస్టు చేశారు. దాదాపు 8 ఏళ్ల తర్వాత కేసులో తీర్పు వెలువడింది.