AP News: నదిలోకి దూకి.. భార్యాభర్తలు, ఇద్దరు పిల్లల గల్లంతు

మామిడికుదురు, న్యూస్‌టుడే: తూర్పుగోదావరి జిల్లా మామిడికుదురు మండలంలోని మొగలికుదురు గ్రామానికి చెందిన భార్యాభర్తలు  శనివారం తమ ఇద్దరు పిల్లలతో సహా చంచినాడ వారధిపై నుంచి వశిష్ఠ నదిలోకి దూకి గల్లంతైనట్లు పోలీసులు అనుమానిస్తున్నారు. వారధిపై ఉన్న ద్విచక్ర వాహనం, పిల్లల దుస్తులను పశ్చిమగోదావరి జిల్లా యలమంచిలి పోలీసులు స్వాధీనం చేసుకున్నారు. కుటుంబంలో చోటుచేసుకున్న గొడవలే ఈ పరిస్థితికి దారితీసినట్లు తెలుస్తోంది. కొందరు వ్యక్తులు చేసిన మోసం, వేధింపుల వల్లే తాము ఆత్మహత్య చేసుకుంటున్నట్లు భార్య పేరుతో ఉన్న ఓ లేఖ, ఆడియో వాట్సప్‌ గ్రూపుల్లోకి రావడం చర్చనీయాంశంగా మారింది.