viral video: పట్టపగలే వ్యాపారిపై కాల్పులు

జైపూర్‌: పట్టపగలు అందరూ చూస్తుండగానే కొంతమంది దుండగులు ఓ వ్యాపారిపై కాల్పులకు తెగబడిన ఘటన రాజస్థాన్‌లోని కోటాలో చోటుచేసుకుంది. కోటాలోని గుమన్‌పురా పోలీసుస్టేషన్ పరిధిలోని కూరగాయల మార్కెట్‌లో ఈ ఘటన జరిగింది. ఆరుగురు దుండగులు రెండు ద్విచక్ర వాహనాలపై ఓ దుకాణం వద్దకు వచ్చారు. అందులోని ఓ వ్యక్తి తుపాకీ తీసి దుకాణంలో ఉన్నవారిపై ఒక్కసారిగా కాల్పులకు దిగాడు. కొన్ని రౌండ్ల కాల్పులు జరిపిన అనంతరం అందరూ అక్కడి నుంచి పరారయ్యారు. అయితే అదృష్టవశాత్తూ దుకాణం యజమాని ప్రాణాలతో తప్పించుకున్నాడు. ఈ ఘటనకు సంబంధించిన దృశ్యాలు సీసీ కెమెరాల్లో నమోదయ్యాయి. సామాజిక మాధ్యమాల్లో ఈ దృశ్యాలు వైరల్‌గా మారాయి. సీసీటీవీ ఫుటేజీ ఆధారంగా పోలీసులు దర్యాప్తు జరుపుతున్నారు.