Crime: జాబ్‌ లేదని వీరంగం.. 20 మందికి కత్తిపోట్లు

ఆరుగురి మృతి.. మరొకరి పరిస్థితి విషమం

బీజింగ్‌: ఉద్యోగం లేదని కుంగుబాటుకు గురైన ఓ యువకుడు కత్తితో వీరంగం సృష్టించాడు. దొరికినవారిని దొరికినట్లు పొడిచేశాడు. ఈ దుర్ఘటనలో ఆరుగురు మృతిచెందగా, 14 మంది గాయపడ్డారు. తూర్పు చైనాలోని హావ్‌నింగ్‌ ప్రాంతం మెయిన్‌లాండ్‌కు చెందిన వూ (25) ఉద్యోగం లేకపోవడంతో కుంగుబాటుకు లోనయ్యాడు. దీనికి తోడు కుటుంబంతో గొడవలు తలెత్తడంతో కోపోద్రిక్తుడై ఈ దారుణానికి పాడినట్లు పోలీసులు తెలిపారు. పదునైన కత్తితో వీధుల్లోకి వచ్చి కనిపించిన వారిపై దాడికి తెగబడ్డాడని, ఈ ఘటనలో ఆరుగురు అక్కడికక్కడే మృతిచెందినట్లు పేర్కొన్నారు. మరో 14 మంది గాయాలపాలై ఆసుపత్రిలో చికిత్స పొందుతున్నట్లు వెల్లడించారు. ఓ వ్యక్తి పరిస్థితి విషమంగా ఉన్నట్లు వివరించారు.

బాధితులు గాయాలతో రోడ్డుపై చెల్లాచెదురుగా పడి ఉన్న ఓ వీడియో సామాజిక మాధ్యమాల్లో చక్కర్లు కొడుతోంది. రోడ్డు పొడవునా రక్తపు మరకలు అందులో కనిపిస్తున్నాయి. నిందితుడిని పోలీసులు అరెస్టు చేసి పోలీసుస్టేషన్‌కు తరలించారు. మే 22న ఓ వ్యక్తి పాదచారులే లక్ష్యంగా కారుతో విధ్వంసం సృష్టంచాడు. ఈ ఘటనలో ఐదుగురు ప్రాణాలు కోల్పోయారు. సదరు నిందితుడిని ప్రశ్నించగా.. సమాజం మీద పగ తీర్చుకునేందుకే తాను ఈ దాడికి పాల్పడినట్లు వెల్లడించడం గమనార్హం.