Andhra News: మత్తులో దూకాడు... నూకలుండి బతికిపోయాడు

శ్రీకాకుళం, న్యూస్‌టుడే: ఓ వ్యక్తి కుటుంబ కలహాల కారణంగా ఆత్మహత్య చేసుకోవాలని భావించాడు. అనుకున్నట్లే నదిలో దూకేశాడు. కానీ భూమి మీద నూకలు ఉండటంతో బతికాడు. ఈ ఘటన శ్రీకాకుళంలో గురువారం జరిగింది. పోలీసులు తెలిపిన వివరాల ప్రకారం... శ్రీకాకుళం దండి వీధికి చెందిన భరత్‌ కుమార్‌ గురువారం బాగా మద్యం తాగాడు. డే అండ్‌ నైట్‌ కూడలి సమీపంలోని నాగావళి వంతెనపై నుంచి దూకాడు. అయితే నదిలో ఆయన పడిన ప్రాంతంలో లోతు తక్కువగా ఉండటం, ప్రవాహం పెద్దగా లేకపోవడంతో మునిగిపోలేదు. ఇటీవల వచ్చిన వరదలకు నదిలో ఓ చోట చెత్త పేరుకుపోయింది. బయటకు వచ్చే మార్గం లేక దానిపై పడుకున్నాడు. స్థానికులు గమనించి విషయాన్ని అగ్నిమాపక సిబ్బంది, పోలీసులకు తెలియజేశారు. వారు అక్కడకు వెళ్లి భరత్‌ కుమార్‌ను ఒడ్డుకు చేర్చారు.