ఆమెపై రూ.2 లక్షల రివార్డు

దుమ్ముగూడెం, న్యూస్‌టుడే: ఛత్తీస్‌గఢ్‌ రాష్ట్రం సుక్మా జిల్లా పోలంపల్లి గ్రామానికి చెందిన పొడియం సోమిడి అనే మహిళా మావోయిస్టు సోమవారం ఆ జిల్లా ఎస్పీ సునీల్‌శర్మ, సీఆర్పీఎఫ్‌ కమాండెంట్‌ యెజ్ఞాన్‌ సింహా సమక్షంలో లొంగిపోయారు. పన్నెండేళ్లుగా మావోయిస్టు ఉద్యమంలో పనిచేసిన సోమిడి.. మావోయిస్టు మిలటరీ ప్లటూన్‌ కిష్టారం ఏరియా కమిటీ మెడికల్‌ టీం సభ్యురాలిగా వ్యవహరించారు. వివిధ ఎదురుకాల్పుల్లో సుమారు 60 మంది జవాన్లు మృతి చెందిన సంఘటనల్లో సోమిడి ప్రత్యక్షంగా పాల్గొన్నట్లు పోలీసు అధికారులు తెలిపారు. ఈమెపై ఛత్తీస్‌గఢ్‌ ప్రభుత్వం రూ.2 లక్షల రివార్డును ప్రకటించింది. స్వచ్ఛందంగా లొంగిపోయిన మహిళా మావోయిస్టుకు రూ.10వేల తక్షణ ఆర్థిక సాయం అందజేశారు.