రూ.12కోట్ల విలువైన అంబర్‌గ్రిస్‌ స్వాధీనం

నరసరావుపేట: తిమింగలం లాలాజలం విక్రయించే ముఠాను చెన్నై వన్యప్రాణుల నేర నియంత్రణ విభాగం అధికారులు పట్టుకున్నారు. వివరాల్లోకి వెళితే.. నరసరావుపేటకు చెందిన 8మంది సభ్యుల ముఠా తిమింగలం లాలాజలం (అంబర్‌ గ్రిస్‌) విక్రయిస్తామని ఆన్‌లైన్‌లో బేరం పెట్టారు. ఇది గమనించిన చెన్నై వన్యప్రాణుల నేర నియంత్రణ విభాగం అధికారులు ఈ ముఠాపై నిఘాపెట్టారు. అంబర్‌ గ్రిస్‌ కొంటామని నమ్మించి... గుంటూరు జిల్లా నరసరావుపేట వచ్చిన చెన్నై అధికారులు స్థానిక టూటౌన్‌ పోలీసుల సాయంతో పువ్వాడ ఆసుపత్రి వద్ద నిందితులను పట్టుకున్నారు. నిందితుల నుంచి 8 కిలోల అంబర్‌ గ్రిస్‌ స్వాధీనం చేసుకున్నారు. దీని విలువ బహిరంగ మార్కెట్‌లో సుమారు రూ.12కోట్ల వరకు ఉంటుందని సమాచారం. నిందితులను నరసరావుపేట కోర్టులో హాజరు పర్చగా.. న్యాయమూర్తి రెండు వారాల రిమాండ్‌ విధించారు.