Crime news: ‘ఫిబ్రవరి 14కల్లా బాయ్‌ఫ్రెండ్‌ ఉండాల్సిందే..’ కాలేజీ ఫేక్‌ నోటీస్‌పై కేసు నమోదు

పారాదీప్‌: ఫిబ్రవరి 14న వాలంటైన్స్‌ డే(Valentine's Day)కు ముందు తమ కాలేజీలో ప్రతి ఒక్క విద్యార్థినికీ తప్పనిసరిగా బాయ్‌ఫ్రెండ్‌ ఉండాల్సిందేనని యాజమాన్యం ఆదేశించినట్టుగా వచ్చిన ఓ ఫేక్‌ నోటీస్‌ తీవ్ర కలకలం రేపింది. ఈ వ్యవహారం ఒడిశా(Odisha)లోని జగత్‌సింగ్‌పూర్‌ జిల్లాలో వెలుగుచూసింది. ఎస్‌వీఎం అటానమస్‌ కళాశాల ప్రిన్సిపల్‌ సంతకంతో ఉన్న ఈ నోటీసు సామాజిక మాధ్యమాల్లో వైరల్‌గా మారింది. ఈ వ్యవహారంపై కళాశాల ప్రిన్సిపల్‌ బిజయ్‌ కుమార్‌ పాత్రా స్పందించారు. ఆ నకిలీ నోటీసును తాము చూసినట్టు తెలిపారు. కొందరు ఆకతాయిలు దీన్ని వైరల్‌ చేశారని తెలిపారు. తమ కాలేజీ ప్రతిష్ఠను దిగజార్చేందుకే ఇలాంటి అనుచిత చర్యలకు పాల్పడ్డారని విమర్శించారు. అలాగే, తన ప్రతిష్ఠను సైతం మసకబార్చేందుకే తన సంతకం ఫోర్జరీ చేశారన్నారు. ఈ ఘటనపై పోలీసులకు ఫిర్యాదు చేసినట్టు ప్రిన్సిపల్‌ వెల్లడించారు. మరోవైపు, ఈ వ్యవహారంపై జగత్‌సింగ్‌పూర్‌ పోలీస్‌ స్టేషన్‌ అధికారి స్పందించారు. దీనిపై ప్రిన్సిపల్‌ తమకు ఫిర్యాదు చేసినట్టు ధ్రువీకరించిన పోలీసులు.. ఈ ఘటనపై దర్యాప్తు చేస్తున్నట్టు చెప్పారు.