Crime news: ఒకే ఇంట్లో నాలుగు మృతదేహాలు .. ఆత్మహత్యగా పోలీసుల అనుమానం!

చెన్నై: తమిళనాడులో విషాద ఘటన వెలుగుచూసింది. ఒకే కుటుంబానికి చెందిన నలుగురు వ్యక్తులు తమ ఇంట్లో విగతజీవులుగా పడి ఉండటం స్థానికంగా కలకలం రేపింది. ఓ వ్యక్తితో పాటు అతడి భార్య, ఇద్దరు పిల్లల మృతదేహాలను చెన్నై సబర్బన్‌  పొలిచలూరులోని ఓ ఇంట్లో పోలీసులు ఈ ఉదయం గుర్తించారు. అయితే, పోలీసులు దీన్ని ఆత్మహత్యలుగా అనుమానిస్తున్నారు. ఇంటి యజమాని తొలుత తన భార్య, పిల్లలను చంపి ఆపై తానూ ఆత్మహత్య చేసుకొని ఉండొచ్చని అనుమానిస్తున్నారు.  వ్యాపారంలో నష్టాలు రావడంతో ఆర్థికపరమైన ఒత్తిళ్ల కారణంగానే అతడు ముందుగా ముగ్గురిని చంపేసి.. ఆ తర్వాత అతడు కూడా ఆత్మహత్య చేసుకున్నట్టుగా కనబడుతోందన్నారు. దీనిపై కేసు నమోదు చేసుకున్న పోలీసులు.. దర్యాప్తు చేస్తున్నట్టు పేర్కొన్నారు.