అంబులెన్స్‌ నిరాకరణ.. కుమార్తె మృతదేహంతో మోటార్‌ సైకిల్‌పై!

భోపాల్‌: మధ్యప్రదేశ్‌లో హృదయ విదారక ఘటన చోటుచేసుకుంది. ప్రభుత్వ ఆసుపత్రి సిబ్బంది అంబులెన్స్‌ నిరాకరించడంతో ఓ తండ్రి తన కుమార్తె మృతదేహాన్ని 70 కిలోమీటర్ల దూరంలో ఉన్న తన గ్రామానికి మోటార్‌సైకిల్‌పై తీసుకెళ్లాడు. మధ్యప్రదేశ్‌లోని షాడోల్‌లో చోటుచేసుకున్న ఈ ఘటనకు సంబంధించిన వీడియో ఒకటి సామాజిక మాధ్యమాల్లో చక్కర్లు కొడుతోంది.

కోట గ్రామానికి చెందిన లక్ష్మణ్ సింగ్ అనారోగ్యంతో బాధపడుతున్న తన కుమార్తె మాధురి (13)ని 70 కిలోమీటర్ల దూరంలో ఉన్న జిల్లా కేంద్రమైన షాడోల్‌లోని ఆస్పత్రిలో చేర్పించాడు. సోమవారం రాత్రి ఆ బాలిక మరణించింది. దీంతో మృతదేహాన్ని తీసుకెళ్లేందుకు అంబులెన్స్‌ ఏర్పాటు చేయాలని కోరగా.. అందుకు ఆస్పత్రి సిబ్బంది నిరాకరించారు. 15 కి.మీల పరిధి దాటితే రావడం కుదరదని చెప్పారు. దీంతో సొంతంగా వాహనం ఏర్పాటు చేసుకునే పరిస్థితి లేక మృతదేహాన్ని మోటర్‌సైకిల్‌పై తీసుకెళ్లేందుకు లక్మణ్‌ సింగ్ ఏర్పాటు చేశారు. అయితే, గ్రామానికి 20 కిలోమీటర్ల దూరంలో ఉండగా షాడోల్‌ కలెక్టర్‌ వందనా వైద్య చూసి.. మృతదేహం తరలించేందుకు వాహనాన్ని ఏర్పాటు చేశారు. ఈ ఘటనపై విచారణకు ఆదేశించారు.