Cairo: చర్చిలో ఘోర అగ్నిప్రమాదం.. 41మంది సజీవ దహనం

కైరో: ఈజిప్టు రాజధాని కైరోలో ఘోర అగ్ని ప్రమాదం సంభవించింది. కాప్టిక్‌ చర్చిలో ఆదివారం పెద్ద ఎత్తున చెలరేగిన మంటల్లో 41మంది సజీవదహనమయ్యారు. మరో 14మంది గాయాలపాలైనట్టు అధికారులు వెల్లడించారు. ఇంబాబాలోని జనసాంద్రత కలిగిన పరిసరాల్లో ఉండే అబూ సెఫీన్‌ చర్చిలో ఈ మంటలు చెలరేగినట్టు అధికారులు వెల్లడించారు. ఈ అగ్నిప్రమాదానికి గల కారణాలు స్పష్టంగా తెలియరానప్పటికీ.. విద్యుత్‌ షార్ట్‌సర్క్యూట్‌ వల్లే మంటలు చెలరేగినట్టు అధికారుల ప్రాథమిక దర్యాప్తులో తేలినట్టు సమాచారం. మరోవైపు, ఈ ఘటనపై ఈజిప్టు అధ్యక్షుడు అబ్దెల్‌ ఫతా సిసి విచారం వ్యక్తంచేశారు. కాప్టిక్‌ క్రిస్టియన్‌ చర్చి పోప్‌ తవాడ్రోస్‌‌-IIకి ఫోన్‌ చేసి తన ప్రగాఢ సంతాపం తెలిపారు.