Smoking Beedi: విమానంలో ‘బీడీ’ కాలుస్తూ పట్టుబడ్డ ప్రయాణికుడు.. ప్రశ్నిస్తే.. అవాక్కయ్యే సమాధానం..!

బెంగళూరు: విమానంలో బీడీ కాలుస్తూ (Smoking) ఓ ప్రయాణికుడు పట్టుబడిన ఘటన బెంగళూరులో చోటుచేసుకుంది. అతడిని కెంపెగౌడ అంతర్జాతీయ విమానాశ్రయంలో (Kempegowda Airport) పోలీసులు అరెస్టు చేశారు. అయితే, తొలిసారి తాను విమానంలో ప్రయాణించానని.. ఇక్కడ నిబంధనల గురించి తనకు తెలియదని చెప్పాడు. గతంలో రైలు ప్రయాణాల్లో ఎన్నోసార్లు టాయిలెట్లలో ధూమపానం చేశానని.. అదేవిధంగా విమానంలో ప్రయాణించినట్లు వెల్లడించడం గమనార్హం.

రాజస్థాన్‌లోని మార్వాడ్‌ ప్రాంతానికి చెందిన ఓ వ్యక్తి (56) తొలిసారి విమాన ప్రయాణం చేశాడు. అహ్మదాబాద్‌ నుంచి విమానంలో బెంగళూరు బయలుదేరాడు. విమానం ప్రయాణిస్తున్న సమయంలో బాత్‌రూమ్‌కు వెళ్లిన ఆయన.. బీడీ కాల్చడం (Smoking Beedi) మొదలుపెట్టాడు. స్మోక్‌ అలర్ట్‌ రావడంతో అప్రమత్తమైన విమాన సిబ్బంది.. బాత్‌రూమ్‌ నుంచి వస్తున్నట్లు గుర్తించారు. బయటకు వచ్చిన తర్వాత అతడిని ప్రశ్నించగా.. నిబంధనల గురించి తనకు తెలియదని చెప్పాడు. చివరకు బెంగళూరుకు చేరుకున్న అనంతరం సదరు ప్రయాణికుడిని విమాన సిబ్బంది పోలీసులకు అప్పగించారు.

ఇతరుల ప్రాణాలకు ముప్పు కలిగించడంతోపాటు ఇతర సెక్షన్ల కింద ఆయనపై కేసు నమోదు చేసిన పోలీసులు అతడిని విచారించారు. తనకు నిబంధనల గురించి తెలియదని చెప్పాడు. గతంలో ఎన్నోసార్లు రైలు ప్రయాణాలు చేసినప్పుడు టాయిలెట్లలో ధూమపానం చేశానని.. ఇప్పడు విమానంలో కూడా అలాగే ప్రయత్నించానని బదులివ్వడం కొసమెరుపు.