Road Accidents: రెండు వేర్వేరు ప్రమాదాల్లో ఐదుగురు మృతి.. ఆరుగురికి గాయాలు

చౌటుప్పల్‌: యాదాద్రి భువనగిరి జిల్లా చౌటుప్పల్ మండల పరిధిలో రెండు వేర్వేరు రోడ్డు ప్రమాదాల్లో ఐదుగురు అక్కడికక్కడే మరణించారు. మరో ఆరుగురికి గాయాలయ్యాయి. ఈ ఘటనలకు సంబంధించి చౌటుప్పల్‌ సీఐ శ్రీనివాస్‌ తెలిపిన వివరాల ప్రకారం.. చౌటుప్పల్‌ మండలం ధర్మోజీగూడెంలో ఆదివారం ఉదయం ఓ కారు, ఆర్టీసీ బస్సు ఢీకొన్నాయి. ఈ ప్రమాదంలో కారులో ప్రయాణిస్తున్న హైదరాబాద్‌ జవహర్‌నగర్‌కు చెందిన చందు(35), ఆసిఫ్‌నగర్‌కు చెందిన సాయి పృథ్వీరాజ్‌(23) అక్కడికక్కడే మృతిచెందారు. బస్సులో ప్రయాణిస్తున్న ఐదుగురికి గాయాలయ్యాయి.

లింగోజిగూడెం వద్ద ముగ్గురు.. 

చౌటుప్పల్ మండలంలోని లింగోజిగూడెం వద్ద శనివారం రాత్రి ద్విచక్ర వాహనాన్ని కారు ఢీకొంది. ఈ ప్రమాదంలో ద్విచక్ర వాహనంపై ప్రయాణిస్తున్న తండ్రీకొడుకుల్లో తండ్రి మృతిచెందాడు. కుమారుడికి గాయాలయ్యాయి. ఈ ప్రమాదం జరిగిన రెండు గంటల తరువాత అదే స్థలంలో మరో ప్రమాదం జరిగింది. ఓ టిప్పర్‌, ద్విచక్రవాహనం ఢీకొన్నాయి. ఈ ప్రమాదంలో ద్విచక్ర వాహనంపై ప్రయాణిస్తున్న ఇద్దరూ అక్కడికక్కడే మృతిచెందారు. మృతులు చిట్యాల మండంలం వెలిమినేడులోని ఓ ప్రైవేటు కంపెనీలో పనిచేస్తున్న ఉద్యోగులుగా పోలీసులు భావిస్తున్నారు. ఐదు మృతదేహాలను పోస్టుమార్టం నిమిత్తం చౌటుప్పల్‌లోని ప్రభుత్వ ఆస్పత్రికి తరలించారు.