AP News: విషాదం.. మునేరులో గల్లంతైన ఐదుగురు విద్యార్థులూ చనిపోయారు

చందర్లపాడు: కృష్ణా జిల్లాలో విద్యార్థుల గల్లంతు ఘటన విషాదాంతమైంది. చందర్లపాడు మండలం ఏటూరు వద్ద మునేరులో ఈతకు దిగి గల్లంతైన ఐదుగురు విద్యార్థులూ విగతజీవులుగా మారారు. ఏడో తరగతి చదువుతున్న మాగులూరి సన్నీ (12), కర్ల బాలయేసు (12), జెట్టి అజయ్‌ (12), ఆరో తరగతి విద్యార్థి మైలా రాకేష్‌ (11), తొమ్మిదో తరగతి విద్యార్థి గురజాల చరణ్‌ (14) గల్లంతయ్యారు. వారి ఆచూకీ కోసం సోమవారం సాయంత్రం నుంచి గాలింపు కొనసాగించారు. మంగళవారం ఉదయం ఆ ఐదుగురి మృతదేహాలను గుర్తించి మునేరు నుంచి వెలికితీశారు. ఎన్డీఆర్‌ఎఫ్‌, పోలీసు, రెవెన్యూ సిబ్బంది ఆధ్వర్యంలో గాలింపు చేపట్టారు. ఈతకు వెళ్లిన పిల్లలు విగతజీవులగా మారడంతో తల్లిదండ్రులు కన్నీరుమున్నీరుగా విలపిస్తున్నారు. 

జరిగింది ఇదీ..

సంక్రాంతి సెలవులు కావడంతో ఇంటివద్దే ఉంటున్న విద్యార్థుల్లో ఐదుగురు సోమవారం మునేరులో స్నానానికి వెళ్లారు. ఇంటి నుంచి సైకిళ్లపై మునేరువైపు వెళ్లారు. పొలం పనులకు వెళ్లిన తల్లిదండ్రులు ఇంటికి వచ్చే సరికి పిల్లలు కనిపించకపోవడంతో వెతకడం ప్రారంభించారు. విద్యార్థులు మునేరువైపు వెళ్లారని పశువుల కాపరి చెప్పడంతో అక్కడకు వెళ్లి చూసే సరికి దుస్తులు, సైకిళ్లు కనిపించాయి. పిల్లల ఆచూకీ లభించకపోవడంతో వెంటనే పోలీసు, రెవెన్యూ అధికారులకు సమాచారం ఇచ్చారు. సోమవారం సాయంత్రం నుంచి ఎన్డీఆర్‌ఎఫ్‌, పోలీసు, రెవెన్యూ సిబ్బంది ఆధ్వర్యంలో గాలింపు చేపట్టారు. ఈరోజు ఉదయం గల్లంతైన విద్యార్థుల మృతదేహాలను వెలికితీశారు.