Andhra News: అనంతపురంలో మధ్యాహ్న భోజనం తిని 40మంది విద్యార్థులకు అస్వస్థత

అనంతపురం గ్రామీణం: అనంతపురం జిల్లా కక్కల్లపల్లిలోని ప్రభుత్వ పాఠశాలలో మధ్యాహ్న భోజనం తిని 40 మంది విద్యార్థులు అస్వస్థతకు గురయ్యారు. పాఠశాలలో ఆహారం తిన్న తర్వాత విద్యార్థులు కడుపునొప్పితో బాధపడుతుండటంతో.. గమనించిన ఉపాధ్యాయులు తల్లిదండ్రులకు సమచారం అందించారు. వారు వచ్చిన తర్వాత అంబులెన్సుల్లో విద్యార్థులను అనంతపురం ప్రభుత్వ ఆస్పత్రికి తరలించి చికిత్స అందిస్తున్నారు. ప్రస్తుతం విద్యార్థుల ఆరోగ్య పరిస్థితి నిలకడగా ఉందని ఆస్పత్రి సూపరింటెండెంట్‌ డా.మల్లేశ్వరి వెల్లడించారు. రేపటి వరకు విద్యార్థులను పర్యవేక్షణలో ఉంచుతామని సూపరింటెండెంట్‌ తెలిపారు.

విద్యార్థుల ఆరోగ్య పరిస్థితిని తెలుసుకునేందుకు ఆస్పత్రికి వచ్చిన డీఈఓ శామ్యూల్‌పై విద్యార్థుల తల్లిదండ్రులు ఆగ్రహం వ్యక్తం చేశారు. ఆస్పత్రిలోని పిల్లల వార్డు వద్ద తల్లిదండ్రులు ఆందోళనకు దిగారు. తల్లిదండ్రులకు సర్దిచెప్పిన డీఈఓ.. ఈ ఘటనకు బాధ్యులైన పాఠశాల ప్రధానోపాధ్యాయుడిని సస్పెండ్ చేసినట్లు చెప్పారు. మధ్యాహ్న భోజన పథకం నిర్వాహకులను తొలగించారు.