Crime News: కుమారుడి క్యాన్సర్‌ చికిత్స కోసం దొంగతనాలు చేస్తున్న మాజీ పోలీస్ అరెస్ట్

బెంగళూరు: క్యాన్సర్‌తో బాధపడుతున్న తన కుమారుడికి చికిత్స చేయించేందుకు దొంగగా మారిన ఓ మాజీ పోలీసుని కర్ణాటక పోలీసులు అరెస్ట్ చేశారు. అరెస్టయిన వ్యక్తిని కేరళకు చెందిన నజీర్ అహ్మద్ ఇమ్రాన్ (61)గా గుర్తించారు. వివరాల్లోకి వెళితే.. నజీర్ భారత్‌కు రాకముందు 9 ఏళ్ల పాటు బహ్రెయిన్‌లో పోలీసుగా పనిచేశాడు. ఈ క్రమంలో అతడి కుమారుడు క్యాన్సర్‌ బారిన పడ్డాడు. దీంతో కుమారుడికి క్యాన్సర్‌ చికిత్సకు డబ్బును సమకూర్చడం కోసం కార్లను చోరీ చేయడం మొదలెట్టాడు. నకిలీ పత్రాలు సృష్టించి దొంగిలించిన కార్లను విక్రయించేవాడు. 2008లోనే నజీర్‌ ఓ సారి అరెస్టయి జైలుపాలయ్యాడు. బెయిల్‌పై జైలు నుంచి విడుదలైన తర్వాత కూడా తీరు మార్చుకోకుండా చోరీలు కొనసాగిస్తున్నాడు. 

సర్వీస్ సెంటర్ నుంచి ఎస్‌యూవీని దొంగిలించాడని ఫిర్యాదు అందడంతో నజీర్‌ను పోలీసులు తాజాగా అరెస్ట్‌ చేశారు.  అతడి నుంచి రెండు బైక్‌లను స్వాధీనం చేసుకున్నారు. తన కుమారుడి చికిత్స కోసమే ఈ నేరాలకు పాల్పడినట్లు నజీర్‌  విచారణలో అంగీకరించాడని పోలీసులు వెల్లడించారు. బెంగళూరు, కేరళలోని పలు ప్రాంతాల్లో వాహనాల దొంగతనాల్లో నజీర్‌ హస్తం ఉన్నట్లు పేర్కొన్నారు.