నల్గొండలో నకిలీ విత్తనాల గుట్టురట్టు

రూ.6 కోట్లు విలువైన విత్తనాలు స్వాధీనం

నల్గొండ: తెలంగాణలోని నల్గొండ జిల్లాలో భారీగా నకిలీ విత్తనాల దందా బయటపడింది. సుమారు రూ.6 కోట్లు విలువైన నకిలీ విత్తనాలను పోలీసులు స్వాధీనం చేసుకున్నారు. ఈ కేసుకు సంబంధించి 13 మంది నిందితులను పోలీసులు అరెస్టు చేశారు. వారి నుంచి సుమారు రూ.4 కోట్లు విలువైన 20 టన్నుల పత్తి, రూ.2 కోట్లు విలువైన 200 టన్నుల వరి, మొక్కజొన్న, కూరగాయల విత్తనాలను స్వాధీనం చేసుకున్నారు. ఈ కేసుకు సంబంధించిన వివరాలను నల్గొండ ఎస్పీ రంగనాథ్ మీడియాకు వెల్లడించారు.

ఎస్పీ తెలిపిన వివరాల మేరకు.. ఆంధ్రప్రదేశ్‌లోని కర్నూలు జిల్లా నంద్యాలకు చెందిన మధుసూదన్ రెడ్డి ప్రధాన సూత్రధారిగా నైరుతీ సీడ్స్‌ ఎండీ శ్రీనివాస్‌ రెడ్డి, ఎంజీ అగ్రీటెక్‌ ప్రతినిధులు ఈ అక్రమ వ్యాపారం కొనసాగిస్తున్నట్లు తెలిపారు. మధుసూదన్‌ రెడ్డి నకిలీ విత్తనాలు విక్రయిస్తూ గత ఏడాది పట్టుబడడంతో పీడీ యాక్ట్‌ పెట్టినట్లు చెప్పారు. అయినప్పటికీ మళ్లీ నకిలీ విత్తనాలు విక్రయిస్తున్నట్లు పేర్కొన్నారు. నాసిరకం, గడువు ముగిసిన విత్తనాలను సేకరించి వాటికి రంగులు వేసి ఏమాత్రం అనుమానం రాకుండా క్యూఆర్‌ కోడ్‌ కూడా ఉండేలా ఈ దందా సాగిస్తున్నట్లు వివరించారు. క్యూఆర్‌ కోడ్ స్కాన్‌ చేస్తే సంస్థ పేరు వచ్చేలా పకడ్బండదీగా ప్యాకెట్లపై ముద్రించి మార్కెట్లోకి తీసుకొస్తున్నట్లు వెల్లడించారు. అనుమానం వచ్చి విత్తన దుకాణాల్లో తనిఖీలు చేసినప్పటికీ నకిలీ విత్తనాలని గర్తించడం దాదాపు అసాధ్యం అనే విధంగా అక్రమ వ్యాపారం కొనసాగిస్తున్నారని చెప్పారు. సుమారు 40 వేల ఎకరాలకు సరిపడా నకిలీ విత్తనాలను మార్కెట్లోకి తీసుకొచ్చేందుకు ప్రణాళిక రూపొందించారని.. సకాలంలో వారిని పట్టుకోవడంతో సుమారు లక్ష మంది రైతులను కాపాడగలిగామని ఎస్పీ వివరించారు.

ఇదే నెలలో సూర్యాపేట జిల్లాలో భారీగా నకిలీ విత్తనాలు పట్టుబడిన విషయం తెలిసిందే. నకిలీ విత్తనాలు తయారు చేసి రైతుల్ని మోసం చేస్తున్న ఆరుగురు సభ్యుల ముఠాను సూర్యాపేట పోలీసులు అరెస్టు చేశారు. హైదరాబాద్‌ వనస్థలిపురం కేంద్రంగా ద్వారకా సీడ్స్‌ పేరుతో గత కొంతకాలంగా నిర్వహించిన ఈ అక్రమ వ్యాపారం గుట్టు రట్టు చేసి రూ.13 కోట్లు విలువైన నకిలీ విత్తనాలను పోలీసులు స్వాధీనం చేసుకున్నారు.