పోలీస్‌ స్టేషన్‌లోనే చోరీ...

స్టోర్‌ రూం నుంచి 185 ఫోన్ల అపహరణ

పుణె (మహారాష్ట్ర): మహారాష్ట్రలో కొల్హాపూర్‌ జిల్లాలోని ఓ పోలీస్‌స్టేషన్‌లో చోరీ సంఘటన చోటు చేసుకుంది. ఈ ఘటనలో ఒకటో రెండో కాకుండా ఏకంగా 185 మొబైల్‌ ఫోన్లు దొంగతనానికి గురికావటం గమనార్హం. కొల్హాపూర్‌కు 38 కిలోమీటర్ల సమీపంలోని జైసింగ్‌పూర్‌ పోలీస్‌ స్టేషన్‌లో గురువారం జరిగిన ఈ సంఘటన ఆలస్యంగా వెలుగులోకి వచ్చింది. వివిధ కేసులలో స్వాధీనం చేసుకున్న 185 మొబైల్‌ ఫోన్లను ఇక్కడి స్టోర్‌రూములో ఉంచారు. ‘‘ఈ పోలీస్‌ స్టేషన్‌ ఆవరణలో వివిధ దొంగతనాలు ఇంకా ఇతర కేసులతో సంబంధమున్న వివిధ ఫోన్లను ఉంచటానికి ఒక గదిని కేటాయించాము. ఈ గురువారం రాత్రి గుర్తుతెలియని ఆగంతకులు ఆ గదిలోకి దొంగతనంగా ప్రవేశించి అక్కడ ఉన్న 185 ఫోన్లను తస్కరించారు.’’ అని సంబంధిత పోలీసు అధికారి ఆదివారం వెల్లడించారు. ఈ ఘటనకు సంబంధించి కేసు నమోదయింది.