డబుల్‌ బెడ్‌రూం ఇళ్ల పేరిట మోసం

ఆరుగురిని అరెస్ట్‌ చేసిన దుండిగల్‌ పోలీసులు

హైదరాబాద్‌: డబుల్‌ బెడ్‌ ఇళ్లను ఇప్పిస్తామంటూ మోసాలకు పాల్పడుతున్న ముఠా గుట్టురట్టయ్యింది. నకిలీ పత్రాలతో వసూళ్లకు పాల్పడుతున్న ఆరుగురిని దుండిగల్‌ పోలీసులు అరెస్ట్‌ చేశారు. వారి నుంచి రూ.1.11 కోట్లు రికవరీ చేశామని సైబరాబాద్‌ పోలీస్‌ కమిషనర్‌ సజ్జనార్‌ తెలిపారు. తప్పుడు పత్రాలతో మోసం చేస్తున్న ఈ ముఠాను దుండిగల్‌ ఎస్‌వోటీ పోలీసులు అరెస్ట్‌ చేసినట్లు తెలిపారు. వెంకట వరప్రసాద్‌ వలశెట్టి ఈ ముఠాకు నాయకత్వం వహిస్తున్నాడని, ఇందులో ఆరుగురిని అరెస్ట్‌ చేశామని సజ్జనార్‌ తెలిపారు. మొత్తం 169 మంది నుంచి డబ్బులు వసూలు చేశారని చెప్పారు. మొత్తం రూ.2 కోట్ల మేర వసూలు చేశారని, రూ.1.11 కోట్లు రికవరీ చేశామన్నారు. తెలంగాణ ప్రభుత్వం డబుల్‌ బెడ్‌రూం ఇళ్ల పథకాన్ని ప్రతిష్టాత్మకంగా చేపడుతోందని, ప్రభుత్వ ఇల్లు ఇప్పిస్తానంటూ వచ్చే దళారులను నమ్మొద్దని ప్రజలకు సూచించారు.