రాజేంద్రనగర్‌లో పేలుడు

రాజేంద్రనగర్‌, హైదరాబాద్‌: రాజేంద్రనగర్‌లోని స్థానిక కాటేదాన్‌ వడ్డెర బస్తీలో చెత్తకుప్పలో పేలుడు సంభవించింది. పేలుడు ధాటికి పరిసర ప్రాంతాల్లోని ఇళ్ల కిటికీ అద్దాలు ధ్వంసమయ్యాయి. ఈ పేలుడుతో స్థానికులు భయాందోళనకు గురయ్యారు. ఆ ప్రాంతంలో ఎవరూ లేకపోవడంతో పెద్ద ప్రమాదమే తప్పిందని స్థానికులు తెలిపారు. సమాచారమందుకున్న మైలార్‌దేవ్‌పల్లి పోలీసులు ఘటనాస్థలానికి చేరుకొని పరిశీలించారు. పేలుడుకు గల కారణాలు తెలియరాలేదు. ఏదైనా రసాయన పదార్థం వల్ల పేలుడు సంభవించిందా? లేదా జిలెటిన్‌ స్టిక్స్‌ వల్ల పేలుడు జరిగిందా? నిర్ధారించాల్సి ఉందని పోలీసులు తెలిపారు.