మద్యం తరలిస్తున్న హోంగార్డు పట్టివేత

వనస్థలిపురం, న్యూస్‌టుడే: అక్రమంగా మద్యం తరలిస్తున్న హోంగార్డును అదుపులోకి తీసుకున్న సంఘటన వనస్థలిపురం ఠాణా పరిధిలో చోటుచేసుకుంది. సీఐ వెంకటయ్య వివరాల ప్రకారం.. సూర్యాపేట జిల్లా నమ్మికల్‌ గ్రామానికి చెందిన అనిల్‌కుమార్‌ మలక్‌పేట ట్రాఫిక్‌ ఠాణాలో హోంగార్డుగా విధులు నిర్వహిస్తున్నాడు. ఇతను తన స్వగ్రామం నుంచి కారులో 36 మద్యం సీసాలను తీసుకుని సైదాబాద్‌కు ఆదివారం ఉదయం బయలుదేరాడు. విధులకు హాజరయ్యేందుకు వెళుతున్నట్లుగా యూనిఫాం ధరించాడు. విశ్వసనీయ సమాచారంతో  పోలీసులు వనస్థలిపురం పనామా వద్ద కారులో తనిఖీ చేసి  మద్యం సీసాలను స్వాధీనం చేసుకున్నారు. హోంగార్డును రిమాండ్‌కు తరలించారు.

మరో ఘటనలో కానిస్టేబుల్‌..

మరో ఘటనలో మద్యం తరలిస్తున్న కానిస్టేబుల్‌ను వనస్థలిపురం పోలీసులు అరెస్టు చేసి రిమాండ్‌కు తరలించారు. సీఐ వెంకటయ్య కథనం ప్రకారం.. నాంపల్లి ఠాణాలో కానిస్టేబుల్‌గా ఉన్న విజయ్‌(30)  ఈనెల 16న గుంటూరు సమీపంలోని పిడుగురాళ్లకు వెళ్లాడు. 17వ తేదీన రాత్రి నగరానికి కారులో బయలుదేరాడు. నల్గొండలో ఓ వ్యక్తి వద్ద మద్యం కొనుగోలు చేశాడు. మద్యం సీసాలను కారులో పెట్టుకొని నగరానికి వస్తుండగా పనామ వద్ద పోలీసులు తనిఖీలు చేపట్టి పట్టుకున్నారు. 23 మద్యం సీసాలను స్వాధీనం చేసుకున్నారు. కానిస్టేబుల్‌పై కేసు నమోదు చేసినట్లు సీఐ తెలిపారు.