‘లూడో’లో ఓడించిందని భార్యపై దాడి

గుజరాత్‌లోని వడోదరలో ఘటన

వడోదర: లాక్‌డౌన్‌ నేపథ్యంలో కాలక్షేపం కోసం భార్యాభర్తలు లూడో ఆడటం మొదలుపెట్టారు. ఈ క్రమంలో ఆమె.. వరుసగా అతన్ని ఓడించింది. దీంతో ఆగ్రహం చెందిన అతను.. ఆమెను దుర్భాషలాడుతూ దాడికి పాల్పడ్డాడు. వెన్నుముకకు తీవ్ర గాయాలు కావడంతో బాధితురాలు ఆస్పత్రిపాలయ్యింది. ఈ ఘటన గుజరాత్‌లోని వడోదర సమీపంలో చోటుచేసుకుంది. భార్య తనకంటే తెలివైందనే ఆత్మన్యూనతాభావానికి లోనై.. ఈ క్రమంలో అహం దెబ్బతినడంతో అతను ఈ దుశ్చర్యకు పాల్పడినట్లు స్థానికంగా ఓ కౌన్సెలర్‌ వివరించారు. చికిత్సనంతరం ఆమె కొన్నాళ్లపాటు తన తల్లిదండ్రులవద్దే ఉండేందుకు నిర్ణయించినట్లు తెలిపారు. ఇదిలా ఉండగా లాక్‌డౌన్‌ వేళ మహిళలపై గృహ హింస కేసులు పెరుగుతున్నట్లు కొన్ని నివేదికలు వెల్లడిస్తున్నాయి.