శ్రీశైలం ఆలయ అవినీతి.. 11 మంది సస్పెన్షన్‌

అమరావతి: కర్నూలు జిల్లా శ్రీశైలం దేవస్థానంలో జరిగిన అవినీతి వ్యవహారంలో బాధ్యులైన ఉద్యోగులపై ఏపీ ప్రభుత్వం చర్యలకు ఉపక్రమించింది. ఈ వ్యవహారానికి సంబంధించి మొత్తం 11 మంది దేవస్థానం ఉద్యోగులను సస్పెండ్ చేయాల్సిందిగా ఆలయ ఈవోను ఆదేశిస్తూ ఉత్తర్వులు జారీ చేసింది. వీరిపై క్రిమినల్ కేసులు నమోదు చేయాల్సిందిగా ప్రభుత్వం ఉత్తర్వుల్లో పేర్కొంది. వీరితో పాటు ఆలయంలో పనిచేసేందుకు డిప్యుటేషన్ పై వచ్చిన 20 మంది ఆంధ్రా బ్యాంకు, ఇతర ఏజెన్సీల ఉద్యోగులపైనా క్రిమినల్ కేసులు నమోదు చేయాల్సిందిగా ఆదేశించింది. 2016 నుంచి 2020 మార్చి వరకు జరిగిన అవినీతికి సంబంధించి దాదాపు రూ. 2.56 కోట్లు దారిమళ్లినట్టు అధికారులు ప్రభుత్వానికి నివేదిక అందించారు. ఈ నేపథ్యంలో మొత్తం సొమ్మును రికవరీ చేయాలని.. బాధ్యులపై శాఖాపరమైన విచారణకు ఆదేశించాల్సిందిగా ప్రభుత్వం ఆదేశాల్లో పేర్కొంది.