సంచిలో చుట్టి.. చెరువులో పడేసి

మహిళ దారుణ హత్య

మహిళ చేతిపై పచ్చబొట్టు

సనత్‌నగర్‌, న్యూస్‌టుడే: గుర్తుతెలియని మహిళ దారుణ హత్యకు గురైంది. తలపై మోది హతమార్చిన దుండగులు మృతదేహాన్ని ప్లాస్టిక్‌ సంచుల్లో చుట్టి బోరబండలోని సున్నం చెరువులో పడేశారు. ఆలస్యంగా వెలుగు చూసిన ఈ ఘటన వివరాలను సనత్‌నగర్‌ సీఐ చంద్రశేఖర్‌రెడ్డి తెలిపారు. శనివారం ఉదయం 10 గంటలకు సున్నం చెరువులో ఓ మృతదేహం ఉన్నట్లు స్థానికుల నుంచి సమాచారం అందింది. చెరువులో నుంచి మహిళ(30-40) మృతదేహాన్ని వెలికి తీయించాం. కాళ్లూ చేతులు కట్టి మృతదేహాన్ని ప్లాస్టిక్‌ బస్తాల్లో పెట్టి చెరువులో పడేశారు. తలపై బలంగా మోదినట్లు గాయాలున్నాయి. హత్య జరిగి నాలుగైదు రోజులై ఉంటుంది. మృతదేహం కుళ్లిపోయింది. ఒంటిపై కుర్తా పైజామా ఉంది. చేతిపై పచ్చబొట్టు ఆధారంగా ఆచూకీ తెలుసుకొనేందుకు యత్నిస్తున్నాం. మృతదేహాన్ని గాంధీ ఆసుపత్రికి తరలించామని సీఐ తెలిపారు.