కొవ్వొత్తుల పరిశ్రమలో పేలుడు: 8 మంది మృతి

ఘజియాబాద్‌: ఉత్తర్‌ప్రదేశ్‌లోని ఘజియాబాద్‌ జిల్లా మోదీనగర్‌లో పేలుడు సంభవించింది. కొవ్వొత్తుల పరిశ్రమలో చోటుచేసుకున్న ఈ ప్రమాదంలో ఎనిమిది మంది మృత్యువాతపడగా.. నలుగురికి గాయాలయ్యాయి. కర్మాగారంలో మండే స్వభావం ఉన్న రసాయనాలు ఉంచగా.. వాటికి మంటలు అంటుకోవడంతో ఈ పేలుడు సంభవించినట్టు తెలుస్తోంది. 

ఈ క్రమంలో అగ్నికీలలు కర్మాగారం మొత్తం వ్యాపించాయి. సమాచారం అందుకున్న అగ్నిమాపక సిబ్బంది ఘటనా స్థలానికి చేరుకొని 12 అగ్నిమాపక యంత్రాలతో మంటలు అదుపు చేశారు. ఈ ఘటనలో క్షతగాత్రులను ఆస్పత్రికి తరలించి చికిత్స అందిస్తున్నారు. మృతుల్లో ఆరుగురు మహిళలు ఉన్నట్టు అధికారులు గుర్తించారు.