దుబే ఎన్‌కౌంట‌ర్‌పై రిటైర్డ్ జ‌డ్జీతో విచార‌ణ‌!

ల‌ఖ్‌న‌వూ: ఉత్త‌ర్‌ప్ర‌దేశ్ గ్యాంగ్‌స్ట‌ర్ వికాస్ దుబే పోలీసుల నుంచి త‌ప్పించుకోవ‌డానికి ప్ర‌య‌త్నించి ఎన్‌కౌంట‌ర్‌లో హతమైన విష‌యం తెలిసిందే. తాజాగా ఈ ఘ‌ట‌న‌పై ద‌ర్యాప్తు జ‌రిపేందుకు యూపీ ప్ర‌భుత్వం స్వ‌తంత్ర ఏక‌స‌భ్య‌ క‌మిష‌న్‌ను ఏర్పాటు చేసింది. రిటైర్డ్ న్యాయ‌మూర్తి నేతృత్వం వ‌హించే ఈ క‌మిష‌న్ రెండు నెల‌ల్లోగా నివేదిక స‌మ‌ర్పించ‌నున్న‌ట్లు యూపీ ప్ర‌భుత్వం ప్ర‌క‌టించింది.

దీనికి ముందు, అత్యంత నేరచ‌రిత్ర క‌లిగిన దుబే ఆ స్థాయికి ఎద‌గ‌డానికి గ‌ల కార‌ణాల‌పై ద‌ర్యాప్తు జ‌రిపేందుకు ఇప్ప‌టికే ప్ర‌త్యేక ద‌ర్యాప్తు బృందాన్ని(సిట్‌)ను ఏర్పాటు చేసింది. ఓ సీనియ‌ర్ ఐపీఎస్ అధికారితోపాటు మ‌రో ఇద్ద‌రు పోలీసులు ఉండే ఈబృందం జులై 31నాటికి నివేదిక స‌మ‌ర్పించ‌నుంది. అయితే, దుబే మ‌ర‌ణానికి సంబంధించిన విష‌యాలను మాత్రం ఈ బృందం ప‌రిశీలించ‌ద‌ని ప్ర‌భుత్వం ఇప్ప‌టికే స్ప‌ష్టం చేసింది. తాజాగా ఏర్పాటు చేసిన ఏక‌స‌భ్య క‌మిష‌న్ మాత్ర‌మే దుబే ఎన్‌కౌంట‌ర్‌పై విచార‌ణ చేప‌ట్ట‌నుంద‌ని తెలిపింది.

ఇదిలా ఉంటే, ఈ కిల్ల‌ర్ గ్యాంగ్‌స్ట‌ర్ ఈ స్థాయికి ఎద‌గ‌డానికి పోలీసుల పాత్ర కూడా ఉంద‌నే ఆరోప‌ణ‌లు వ‌చ్చాయి. స్థానిక పోలీస్ స్టేష‌న్ ఇన్‌చార్జ్ అధికారితోపాటు మ‌రో న‌లుగురు సిబ్బందిని ఇప్ప‌టికే సస్పెండ్ చేశారు. మ‌రో 30మంది పోలీసు అధికారుల‌పై కూడా విచార‌ణ కొన‌సాగుతోంది.