ప్రేమ పేరుతో కానిస్టేబుల్‌ వంచన

మంత్రాలయం: అనంతపురం జిల్లా ఉరవకొండ సర్కిల్‌లోని విడపనకల్లు పోలీసుస్టేషన్‌లో పనిచేసే కానిస్టేబుల్‌ బద్రినాథ్‌ తనను ప్రేమించి మోసం చేశాడని ఓ యువతి సెప్టెంబరులో పోలీసులకు ఫిర్యాదు చేశారు. దీనిపై విడపనకల్లు పోలీసులు కేసు నమోదు చేసి విచారణ చేపట్టారు. మంత్రాలయంలో ఓ ప్రైవేటు లాడ్జిలో వారిద్దరూ తరచూ కలిసేవారని దర్యాప్తులో తేలడంతో కేసును మంత్రాలయం సర్కిల్‌ పోలీసు స్టేషన్‌కు బుధవారం బదలాయించారు. మంత్రాలయం సీఐ కృష్ణయ్య దీనిపై కేసు నమోదు చేసి విచారణ చేపట్టారు. ఆయన వివరాల మేరకు.. బళ్లారికి చెందిన యువతితో బద్రినాథ్‌ పది సంవత్సరాల నుంచి ప్రేమాయణం కొనసాగిస్తున్నారు. వీరు మంత్రాలయానికి తరచూ వచ్చి ప్రైవేటు లాడ్జీలో ఉండేవాళ్లు. ప్రస్తుతం కానిస్టేబుల్‌ మరో మహిళను వివాహం చేసుకున్నారు. తనను మోసం చేశాడని గుర్తించిన ఆ యువతి పోలీసులను ఆశ్రయించారు. వారు మంత్రాలయంలో కలిసి తిరిగినట్లు కొన్ని సీసీ కెమెరాల్లో నమోదైంది. వీరు సమీప బంధువులని తెలుస్తోందని, దీనిపై విచారణ జరుపుతున్నట్లు సీఐ పేర్కొన్నారు.