Crime News: పెళ్లి సందట్లో.. భారీ చోరీ

రూ. 2 కోట్ల వజ్రాభరణాలు, రూ. 95 వేల నగదు అపహరణ

జైపుర్‌: రాజస్థాన్‌లోని ఓ ఐదు నక్షత్రాల హోటల్‌లో భారీ చోరీ జరిగింది. దాదాపు రూ. 2 కోట్ల విలువైన వజ్రాల నగలతో పాటు, రూ. 95 వేల నగదును గుర్తు తెలియని వ్యక్తులు అపహరించారు. జైపుర్‌లో గురువారం ఈ దొంగతనం జరిగింది. పోలీసులు అందించిన సమాచారం ప్రకారం.. ముంబయికి చెందిన వ్యాపారి రాహుల్‌ భాటియా కుమార్తె వివాహాన్ని ఈ హోటల్‌లో నిర్వహిస్తుండగా.. ఆ కుటుంబం ఏడో అంతస్తులోని ఓ గదిలో బస చేసింది. వారంతా హోటల్‌ ప్రాంగణంలో పెళ్లి వేడుకకు వెళ్లిన సమయంలో చోరీ జరిగింది. హోటల్‌ సిబ్బంది సహకారంతోనే ఈ దొంగతనం జరిగి ఉండొచ్చన్న అనుమానాన్ని వ్యక్తం చేస్తూ భాటియా పోలీసులకు ఫిర్యాదు చేశారు. సీసీ టీవీ ఫుటేజిని పరిశీలిస్తున్నామని పోలీసులు తెలిపారు.