Crime News: సుపారీ ఇచ్చి.. యువకుడిని హత్య చేయించిన తోటి విద్యార్థినులు

గుమ్మిడిపూండి, న్యూస్‌టుడే: తమను తరచూ బెదిరిస్తుండటంతో కిరాయి హంతకులతో మాట్లాడి తోటి విద్యార్థినులే యువకుడిని హత్య చేయించినట్లు దర్యాప్తులో తేలింది. మంగళవారం తమిళనాడు, ఆరంబాక్కం పోలీసులు తెలిపిన వివరాల మేరకు.. రెండు రోజుల క్రితం గుమ్మిడిపూండి, పెద్దఓబులాపురం పరిధిలోని ఈచ్చక్కాడులో గుర్తు తెలియని వ్యక్తి మృతదేహం భూమిలో పాతిపెట్టి ఉండడాన్ని స్థానికులు గుర్తించి పోలీసులకు సమాచారం అందించారు. తహసీల్దారు మహేష్‌ సమక్షంలో పోలీసులు మృతదేహాన్ని స్వాధీనం చేసుకుని పోస్టుమార్టం నిమిత్తం పొన్నేరి ప్రభుత్వ ఆసుపత్రికి తరలించారు. కేసు నమోదు చేసి దర్యాప్తు చేపట్టగా.. మృతుడు చెంగల్పట్టు జిల్లా గూడువాంజేరి సమీపంలోని మన్నివాక్కానికి చెందిన ప్రేంకుమార్‌(20)గా గుర్తించారు. చెన్నై, మీనంబాక్కం కళాశాలలో చదువుతున్న ఇతను తోటి విద్యార్థినులతో అసభ్యంగా మాట్లాడే వాడని, ఇలా సంభాషించిన ఆడియోను తల్లిదండ్రులకు పంపినట్లు బెదిరించేవాడని తెలిసింది. ఇలా అతని ప్రవర్తనతో ఇబ్బందులు ఎదుర్కొన్న విద్యార్థినులు కిరాయి హంతకుల సాయంతో ప్రేంకుమార్‌ను హత్య చేయించినట్లు బయటపడింది. కేసు దర్యాప్తులో ఉంది.