Firing: కుమార్తెను కొట్టడంతో.. పాఠశాల డైరెక్టర్‌పై జవాను కాల్పులు

జైపుర్‌: హోం వర్క్‌ చేయనందుకు కుమార్తెను టీచర్‌ కొట్టడంపై ఆర్మీ జవాను ఆగ్రహంతో ఊగిపోయాడు. ఈ క్రమంలో ఏకంగా పాఠశాల డైరెక్టర్‌పైనే కాల్పులు జరిపాడు. రాజస్థాన్‌లోని భరత్‌పుర్‌ జిల్లాలో సోమవారం ఈ ఘటన చోటుచేసుకుంది. కన్వాడా గ్రామానికి చెందిన సైనికుడు పప్పు గుర్జార్‌ కుమార్తె ఓ ప్రైవేటు పాఠశాలలో చదువుతోంది. హోం వర్క్‌ చేయకపోవడంతో టీచర్‌ ఆమెను చెంపదెబ్బ కొట్టింది. ఆ విషయాన్ని విద్యార్థిని తన తండ్రికి చెప్పింది. దీంతో కోపంతో రగిలిపోయిన పప్పు గుర్జార్‌ పాఠశాల డైరెక్టర్‌ను కలిసేందుకు వెళ్లాడు. ఈ క్రమంలో ఇద్దరి మధ్య వాగ్వాదం చెలరేగింది. అనంతరం గుర్జార్‌ తన వెంట తెచ్చుకున్న రివాల్వర్‌ తీసి పాఠశాల డైరెక్టర్‌పై ఎక్కుపెట్టాడు. అనంతరం కాల్చాడు. ఇంతలో గొడవ ఆపేందుకు మధ్యలోకి వచ్చిన గుర్జార్‌ భార్య భుజానికే ఆ తూటా తగిలింది. అనంతరం జవాను అక్కడి నుంచి పరారైనట్లు పోలీసులు తెలిపారు.