Hyderabad News: సైబర్‌ దొంగలకు పోలీసుల ఝలక్‌!

నారాయణగూడ, న్యూస్‌టుడే: సైబర్‌ నేరగాళ్లకే పోలీసులు ఝలక్‌ ఇచ్చారు. ఓ పేమెంట్‌ గేట్‌వే సంస్థ సర్వర్‌ను హ్యాక్‌ చేసి కొట్టేసిన రూ.51 లక్షలతో పాటు ఆ మోసగాడి ఖాతాలో ఉన్న మరో రూ.49 లక్షలు.. మొత్తం రూ.కోటి ఫ్రీజ్‌ చేయించారు. బాధిత సంస్థ యాజమాన్యం సకాలంలో ‘నేషనల్‌ సైబర్‌ క్రైమ్‌ రిపోర్టింగ్‌ పోర్టల్‌(ఎన్‌సీసీఆర్‌పీ)’లో ఫిర్యాదు చేయడంతోనే ఇది సాధ్యమైందని పోలీసులు తెలిపారు. హైదరాబాద్‌ సైబర్‌ క్రైమ్‌ ఠాణా ఏసీపీ కె.వి.ఎం.ప్రసాద్‌ కథనం ప్రకారం.. బంజారాహిల్స్‌లో ‘ఎక్స్‌ సిలికా సాఫ్ట్‌వేర్‌ సోల్యూషన్స్‌ ప్రైవేటు లిమిటెడ్‌’ అనే ‘పేమెంట్‌ గేట్‌వే’ సంస్థ ఉంది. ఓ సైబర్‌ దొంగ ఇందులో ఖాతాదారుడిగా చేరాడు. సంస్థ సాఫ్ట్‌వేర్‌లోని లోపాలను పసిగట్టి, సర్వర్‌ను హ్యాక్‌ చేసి రూ.51 లక్షలు దోచేశాడు. అప్రమత్తమైన యాజమాన్యం వెంటనే ఎన్‌సీసీఆర్‌పీ పోర్టల్‌లో ఫిర్యాదు చేసింది. స్పందించిన పోలీసులు దోచిన సొమ్ము ఏ బ్యాంక్‌ ఖాతాలో జమా అయిందో తెలుసుకొని, ఆ ఖాతాను ఫ్రీజ్‌ చేయించారు. దీంతోపాటు అప్పటికే ఆ ఖాతాలో ఉన్న మరో రూ.49 లక్షలనూ ఫ్రీజ్‌ చేశారు. ఈ సొమ్ము కూడా ఇతరుల నుంచి కొట్టేసిందే అని చెబుతున్నారు. గతంలో కూడా ఇదే తరహాలో ఓ గేట్‌వే సంస్థకు సంబంధించి రూ.1.20 కోట్లు కొట్టేశారు. సకాలంలో ఫిర్యాదు చేయకపోవడంతో ఆ సొమ్మును కాపాడలేకపోయామన్నారు. ఎవరైనా ఇలా సొమ్ము పోగొట్టుకుంటే ఎన్‌సీసీఆర్‌పీ నంబరు 155260లో, www.cybercrime.gov.in  లో ఫిర్యాదు చేయాలని సూచించారు.