ట్రాక్టర్‌ తిరగబడి డ్రైవర్‌ మృతి

నేలకొండపల్లి, న్యూస్‌టుడే: మండలంలోని కోనాయిగూడెం సమీపంలో కంప్రెషర్‌ ట్రాక్టర్‌ తిరగబడటంతో డ్రైవర్‌ మృతి చెందాడు. స్థానికుల కథనం ప్రకారం... ముదిగొండ గ్రామానికి చెందిన వేముల నాగరాజు(32) స్థానిక కంకర క్వారీలో కంప్రెషర్‌ డ్రైవరుగా పని చేస్తున్నాడు. శుక్రవారం విధులు నిర్వర్తించి క్వారీ నుంచి బయటకు వస్తున్న క్రమంలో కంప్రెషర్‌ ట్రాక్టరు అదుపుతప్పింది. దీంతో రహదారి వెంట ఉన్న వ్యవసాయ భూమిలో ట్రాక్టరు బోల్తాపడింది. నాగరాజుపై ట్రాక్టరు పడటంతో అక్కడికక్కడే అతను మృతి చెందాడు. వాహనంపై ఉన్న మరో వ్యక్తి రాజుకు సైతం తీవ్ర గాయాలయ్యాయి. దీంతో మృతుని బంధువులు స్థానిక క్వారీ వద్దకు భారీగా చేరుకున్నారు. యాజమాన్యం సరైన భద్రతా చర్యలు తీసుకోకపోవడంతోనే ప్రమాదం జరిగిందని వారు ఆరోపించారు. పరిహారం చెల్లించాలని డిమాండ్‌ చేశారు.