గోదావరిలో అక్కాచెల్లెళ్లు మృతి

కొవ్వూరు పట్టణం, న్యూస్‌టుడే: గోదావరి అందాలను చూద్దామని ఆ అక్కాచెల్లెళ్లు పురుషోత్తపల్లి నుంచి వచ్చారు. అప్పటివరకు సరదాగా గడిపారు. ఫోటోలు తీసుకుంటూ ప్రమాదవశాత్తూ గోదావరిలో పడి మృతిచెందారు. ఈ విషాదకర ఘటన మద్దురు శివారులో శనివారం రాత్రి జరిగింది. పోలీసులు, స్థానికుల వివరాల మేరకు.. నిడదవోలు మండలం పురుషోత్తపల్లికి చెందిన అక్కాచెళ్లెల్లు కోసన లక్ష్మి ప్రసన్న(22), సాయి రాజేశ్వరి(21) గోదావరి చూడటానికి వచ్చారు. విజ్జేశ్వరం నుంచి ధవళేశ్వరం మధ్యలో మద్దూరులంక సమీపంలో ఫొటోలు తీసుకోడానికి వెళ్లి ప్రమాదవశాత్తు గోదావరిలో పడి మృతిచెందారు. స్థానికులు గుర్తించి రాజమహేంద్రవరం ఆసుపత్రికి తరలించారు. అప్పటికే మృతిచెందినట్లు వైద్యులు గుర్తించారు. ఆసుపత్రి నుంచి వచ్చిన సమాచారం మేరకు పోలీసులు విచారణ చేపట్టారు.