భార్యతో కలసి బెంగళూరు వెళ్లి అదృశ్యం

కోడలిపై అనుమానంతో అత్త ఫిర్యాదు

షేక్‌ షఫి (పాతచిత్రం)

మదనపల్లె నేరవార్తలు, న్యూస్‌టుడే: తన కుమారుడు కోడలితో కలసి కూలీపనుల కోసం బెంగళూరుకు వెళ్లాడని అయితే తన కోడలు మాత్రమే తిరిగి వచ్చిందని కుమారుడు తిరిగి రాలేదని అతని చరవాణి కూడా స్విచ్‌ఆఫ్‌ అయి ఉందని మదనపల్లె రూరల్‌ బోడిమల్లదిన్నెకు చెందిన ప్యారూబీ ఆదివారం రూరల్‌ పోలీసులను ఆశ్రయించారు. బాధితురాలి ఫిర్యాదు మేరకు. తన కుమారుడు షేక్‌ షఫి (32) భార్య అరబ్‌జాన్‌తో కలసి కొంతకాలం క్రితం బెంగళూరుకు వెళ్లారన్నారు. అయితే వీరిద్దరి పిల్లలను తమ వద్దే ఉంచి వెళ్లారని ఆమె తెలిపారు. ఇటీవల అరబ్‌జాన్‌ మాత్రమే తిరిగి వచ్చిందని తన కుమారుడి గురించి విచారిస్తే ఆమె సరైన సమాధానం చెప్పకుండా పొంతనలేని సమాధానం చెప్పడంతో ఆమెపై అనుమానం వ్యక్తం చేశారు. తన కుమారుడిని కోడలు బెంగళూరులో ఏమో చేసిందని అందుకే తమ కుమారుడు కన్పించకుండా పోయాడని ఆమె పోలీసులకు ఫిర్యాదు చేశారు. రూరల్‌ సీఐ సత్యనారాయణ, ఎస్సై చంద్రశేఖర్‌లు కేసు విచారణ చేస్తున్నారు.