వాహనం ఢీకొని యువకుడి దుర్మరణం

క్షతగాత్రుడిని తరలిస్తున్న సిబ్బంది

బొండపల్లి, న్యూస్‌టుడే: ద్విచక్ర వాహనం ఢీకొన్న ప్రమాదంలో యువకుడు మృతి చెందిన ఘటన మండలంలోని నెలివాడ జాతీయ రహదారి కూడలి వద్ద చోటుచేసుకుంది. ఈ ఘటనపై ఎస్సై ఎస్‌.రవి అందించిన వివరాల ప్రకారం... విశాఖపట్నం జిల్లా పరవాడకు చెందిన చిటికెల ధనంజయ్‌(19) అదే ప్రాంతానికి చెందిన వై.అరుణ్‌ కుమార్‌తో కలసి ద్విచక్రవాహనంపై బొబ్బిలిలో తమ బంధువుల పెళ్లికి వెళ్లి ఆదివారం రాత్రి తిరిగి వస్తున్నాడు. ఈక్రమంలో నెలివాడ వద్ద గుర్తుతెలియని ద్విచక్రవాహనం వీరిని ఢీ కొట్టింది. ఈ ప్రమాదంలో ధనంజయ్‌ తలకు తీవ్రగాయాలు కావడంతో అక్కడికక్కడే మృతి చెందాడు. గాయాలైన అరుణ్‌కుమార్‌ను 108 వాహనంలో విజయనగరం ప్రభుత్వాసుపత్రికి తరలించారు. దీనిపై కేసు నమోదు చేసి దర్యాప్తు చేస్తున్నట్లు ఎస్సై తెలిపారు.