విశాఖ వాసి రాజమహేంద్రవరంలో అదృశ్యం

అప్పుల బాధతో ఆత్మహత్య చేసుకుంటున్నానంటూ లేఖ

వంతెనపై వదిలి వెళ్లిన కారు.. చంద్రశేఖర్‌

రాజమహేంద్రవరం నేరవార్తలు, పెదవాల్తేరు, న్యూస్‌టుడే: అప్పుల బాధతో ఆత్మహత్య చేసుకుంటున్నానంటూ లేఖ రాసి విశాఖకు చెందిన ఓ వ్యక్తి తూర్పుగోదావరి జిల్లా రాజమహేంద్రవరంలో అదృశ్యమయ్యారు. రెండో పట్టణ సీఐ ఆర్‌.విజయ్‌కుమార్‌ తెలిపిన వివరాల ప్రకారం.. శుక్రవారం వేకువ జాము నుంచి ఓ కారు రోడ్డు, రైలు వంతెనపై నిలిచి ఉండటంతో అనుమానం వచ్చి ఓ వాహనచోదకుడు పోలీసులకు సమాచారం ఇచ్చాడు. అక్కడికి చేరుకున్న పోలీసులు కారును పరిశీలించగా అందులో చిన్న కాగితం లభించింది. ఆర్థిక సమస్యల కారణంగా చనిపోవాలని నిర్ణయించుకున్నానని, గోదావరిలో దూకేస్తున్నానని, తన భార్యకు ఈ విషయం చెప్పాలని అందులో రాశారు. కారులోని బ్యాంకు పాస్‌బుక్‌, ఇతర ఆధారాలతో ఆ వ్యక్తి విశాఖపట్నంలోని కిర్లంపూడి లే-ఔట్‌కు చెందిన కాట్రగడ్డ చంద్రశేఖర్‌(61)గా పోలీసులు గుర్తించారు. ఆయన గోదావరిలో దూకి బలవన్మరణానికి పాల్పడ్డారా..? మరెక్కడికైనా వెళ్లిపోయారా..? అనే కోణాల్లో దర్యాప్తు చేస్తున్నామని సీఐ తెలిపారు. వంతెన కింద నదిలో గాలింపు చర్యలు చేపట్టామన్నారు. అప్పుల కారణంగా చంద్రశేఖర్‌ గతంలోనూ ఓ సారి ఇలాగే చేసి తిరిగి ఇంటికి వచ్చేశారని ఆయన భార్య చెబుతున్నారని సీఐ తెలిపారు. చంద్రశేఖర్‌కు రాజకీయ, స్థిరాస్తి వ్యాపార ప్రముఖులతో పరిచయాలు ఉన్నాయి. ఈయన హామీగా ఉండి కొందరికి అప్పులిప్పించినట్లు సమాచారం. ఇద్దరు పిల్లలు విదేశాల్లో ఉన్నట్లు స్థానికులు చెబుతున్నారు.