బాలుడిని బలిగొన్న మురుగు గుంత

మద్దూరు, న్యూస్‌టుడే : గ్రామం మధ్యలో ఉన్న మురుగు గుంత మూడేళ్ల బాలుడిని బలిగొంది. అప్పటి వరకు ఆడుకుంటూ  ఉన్న బాలుడు అందులో పడి మృత్యువాత పడ్డాడు. బాధితుల కథనం మేరకు.. మద్దూరు మండలంలోని ఎక్కమెడ్‌ గ్రామానికి చెందిన కాశమ్మ, మొగులప్ప దంపతులకు ముగ్గురు కుమారులు ఉన్నారు. కాశమ్మ మొహర్రం సందర్భంగా పిల్లలతో కలిసి పుట్టినిలైన నిడ్జింతకు వచ్చారు. గురువారం మధ్యాహ్న సమయంలో ఆమె ఇంట్లో పని చేస్తుండగా.. చిన్న కుమారుడు విష్ణు (3) ఆడుకుంటూ ఇంటికి సమీపంలో గ్రామం మధ్యలో ఉన్న మురుగు గుంతలో పడిపోయాడు. కాసేపటి తరవాత కుమారుడు కనిపించడం లేదని కాశమ్మ వెతుకుతుండగా.. మురుగు గుంతలో పడిఉండటం గమనించారు. బయటకు తీసి మద్దూరు పీహెచ్‌సీకి తరలించగా.. పరీక్షించిన వైద్యులు అప్పటికే మృతి చెందినట్లు నిర్ధారించారు. నిడ్జింత గ్రామం మధ్యలో ఉన్న మురుగు గుంత ప్రమాదకరంగా ఉంది. రెండేళ్ల కిందట 45 ఏళ్ల వ్యక్తి కూడా ప్రమాదవశాత్తు దీనిలోపడి మృతి చెందాడు. గుంతను పూడ్చాలని అధికారులకు విన్నవించినా స్పందించడం లేదని, ఇకనైనా పూడ్చాలని గ్రామస్థులు కోరుతున్నారు.