Crime News: నల్లనిదానివంటూ భర్త అవహేళన.. గొడ్డలితో హతమార్చిన భార్య

దుర్గ్‌(ఛత్తీస్‌గఢ్‌): నువ్వు నల్లగా ఉంటావు అంటూ భర్త పదేపదే తనను అవహేళన చేస్తుండటాన్ని ఆ భార్య భరించలేకపోయింది. తాళికట్టిన పెనిమిటే అయినా అతన్ని గొడ్డలితో నరికి చంపింది. ఈ ఘటన ఛత్తీస్‌గఢ్‌ దుర్గ్‌ జిల్లాలో చోటు చేసుకుంది. పోలీసులు తెలిపిన వివరాల ప్రకారం.. అమలేశ్వర్‌ గ్రామానికి చెందిన అనంత్‌ సాన్‌వాని(40) నల్లగా ఉన్న తన భార్య సంగీతను అసహ్యంగా పిలిచేవాడు. ఆమె శరీరఛాయపై అవహేళన చేసేవాడు. దీంతో వారిద్దరి మధ్య తరచూ గొడవలు జరిగేవి. ఈ క్రమంలో ఆదివారం రాత్రి వారిద్దరి మధ్య మాటామాటా పెరిగింది. దీంతో ఉద్రేకం పట్టలేని సంగీత తన భర్తపై ఇంట్లోని గొడ్డలితో దాడి చేసి అక్కడికక్కడే చంపేసింది. అంతేకాకుండా అతడి జననాంగాలను కోసేసింది. సోమవారం ఉదయం తన భర్తను ఎవరో హతమార్చారంటూ గ్రామస్థులకు చెప్పింది. అయితే పోలీసు విచారణలో తానే హత్య చేసినట్లు ఒప్పుకుంది.