Crime News: ప్రియుడిని చంపి డ్రమ్ములో తీసుకెళ్లి తగులబెట్టేసింది!

ఛత్తీస్‌గఢ్‌ రాజ్‌నంద్‌గావ్‌లో దారుణ సంఘటన చోటుచేసుకుంది. డబ్బు విషయంలో వివాదం తలెత్తడంతో ఓ ప్రియురాలు తన ప్రియుడిని హతమార్చింది. అనంతరం మృతదేహాన్ని డ్రమ్ములో పెట్టి అడవిలోకి తీసుకెళ్లి తగులబెట్టింది. చంద్ర భూషణ్‌ అనే వ్యక్తి కనిపించడం లేదంటూ ఆయన కుటుంబసభ్యులు మూడురోజుల కిందట పోలీసులకు ఫిర్యాదు చేశారు.

ఈ క్రమంలోనే కోట్నా పానీ అడవుల్లో రెండు రోజుల క్రితం గుర్తు తెలియని, సగంకాలిన మృతదేహం స్థానికులకు కనిపించింది. సమాచారం అందుకున్న పోలీసులు ఘటనాస్థలికి చేరుకుని దానిని స్వాధీనం చేసుకున్నారు.  ఆ మృతదేహం చంద్ర భూషణ్‌దిగా గుర్తించారు.  రాగిణి సాహు అనే మహిళను అదుపులోకి తీసుకుని విచారించగా.. విస్తుపోయే విషయాలు వెల్లడయ్యాయి. చంద్ర భూషణ్‌.. రాగిణి ప్రేమికులు. రాగిణికి కొంతమొత్తం చంద్ర భూషణ్‌ అప్పుగా ఇచ్చాడు. ఈ విషయమై ఇద్దరికీ ఇటీవల విభేదాలు ఏర్పడ్డాయి. ఈ నేపథ్యంలో చంద్రభూషణ్‌ పలుమార్లు ప్రియురాలిని బ్లాక్‌ మెయిల్‌ చేసి వేధించాడు. దీంతో కోపోద్రిక్తురాలైన రాగిణి.. నూతన సాహు అనే స్నేహితుడితో కలిసి  చంద్రభూషణ్‌ను హత్య చేసింది